Biba Ha’ånen Guinaiya! Håfa bidå-mu på’go na såkkan put Ha’ånen Guinaiya? Kao mamåhan hao flores pat chukulåti? Kao mama’tinas hao ninå’i para especiat na taotao gi lina’lå-mu? Puedi un gosa i ha’åne’. Humånao ham para i Oregon Coast put Ha’ånen Guinaiya. Gof espesiat para hami sa’ fine’nina na hinanao-måmi. Ga’ña-ku sumåga gi gimå’-hu, lao gof ya-hu i kanton tåsi siha giya Oregon. Sen bonito.
In dingu i siuda gi pupuengen Betnes sa’ machocho ham todu diha. Måtto ham gi sagån-mami despues di minacham i atdao, ya esta gof homhom. Sumåga ham gi un dikike’ na guma’ giya Rockaway Beach. Gof kiñute i gima’ sa’ gof dikike’! Yanggen malago’ hao sumåga guihi lokkue’, siña un sodda’ i gima’ gi Airbnb. Na’ån-ña i gima’ “I Ma’asen na Pirate yan i Asaguå-ña.”
Makmåta ham gof taftaf gi egga’an Sabålu. Åntes di i inetnon praktika mamåhan ham amotsa gi Grumpy’s Cafe. Fina’mames todu i na’måmi ya gof mångnge’. Si Jay fuma’tinasi ham kafe ya chumocho ham gi durånten i inetnon praktika. In ekungok yan pula i kanta “Hågu” ginen as Flora Baza Quan. I kantan-måmi! Gof maolek na kånta put Ha’ånen Guinaiya.
Despues di praktika mamokkat ham gi kanton tåsi. Ti gof meggai na taotao siha giya Rockaway Beach sa’ tiempon minanengheng. Lao gof bonito i ha’åne achokka’ tiempon minanengheng. Suette ham sa’ tåya’ mapagåhes ya gof asut yan klåru i langhet. Ti gof manengheng yo’ gi papa’ i ma’lak na somnak! Meggai na biahi Si Jay pumacha i tasi, ya malago’-ña na para hu pacha lokkue’. Ti gof malago’ yo’ pumacha i tasi sa’ hu tungo’ na gof manengheng i hanom! Ti islå-ta este na tåno’! Lao hu agradesi i ginefpå’go-ña.
Annai tumohge yo’ gi inai, hu egga’ yan ekungok i napu siha. Manatan yo’ kåttan yan luchan gi kanton tåsi, ya kalang taihinekkok i tasi. Siña hu siente i dinikike’-hu gi kanton tåsi. Maolek este sa’ ha na’hasso yo’ na ti gof dångkolo’ i chathinasso-ku siha. Todu i tiempo i kanton tåsi ha na’lamaolek i siñiente-ku. Åntes di måtto ham giya Rockaway Beach, ti hu gof komprende na hu gof nisisita este na bakasion. Gof tinane’ i lina’lå-hu ya sesso ti siña yo’ dumeskånsa sa’ umeskuekuela yo’ ya machochocho yo’ lokkue’. Sesso gof yayas yo’. Lao i kanton tåsi ha na’lå’la yo’ ta’lo.
Pues mañugon ham para i otro na songsong siha. Mamåhan yo’ kattita siha gi Wild Coast Goods giya Nehalem. Pues chumocho ham chowder gi fi’on i saddok guihi. Gof mångnge’ i nengkånno’ gi buttercup na fañochuyan! Mamokkat ham lokkue’ gi uriyan i Manzanita na songsong. Guaha kiñute na tendan lepblo guihi, i Mapagåhes yan Hagon. (Gof ya-hu i na’ån-ña!) Ti mamåhan yo’, lao in gosa umatan i rinikohin-ñiha. Gi minigåhet, ti malago’ yo’ mamåhan meggai gi hinanao-måmi sa’ hu nisisita umapåsi i eskuelå-hu. Gof guaguan!!! Lao mañodda’ yo’ kiñute na kattita siha para i manga’chong-hu. Cannon Beach na songsong i uttimo na binisitan-måmi. Mamokkat ham gi kanton tåsi guihi lokkue’.
Ai, hu agradesi na humånao ham yan i guinaiyå-ku para i Oregon Coast. Gof ya-hu ayu na lugåt! Monhåyan i bakasion-måmi ya gaiminahålang yo’ esta!
Lengguahi-ta 
Eeee na boninitu tinige mu! Gof yahu umekunguk taotao siha ni manguenguetos gi linguahita! Magof yu na hu sodda esti! Esta hu ayao i praktikamu ni manugi “journal” kadaha’ani… estigi no tatitiyi hao talu!
LikeLike
Si Yu’os Ma’åse! Magof yo’ na un gosa i tinige’-hu! Guahu lokkue’, gof ya-hu umekungok i lengguahi-ta. Gof bonitu i lengguahen Chamoru, no? Ya kao ya-mu i praktikan journal gi Chamoru? Puedi para bai hu taitai pat ekungok i che’cho’-mu gi Chamoru 🙂
LikeLike