Here is an OCR transcription of the Novena to the Christ Child in Chamorro. Please note that this page is a work in progress as we correct any OCR transcription errors and also update the spelling.
Contents
| Mafona Na Tinayuyut Finenana Na Ha’åne Mina’dos Na Ha’åne Mina’tres Na Ha’åne Mina’kuatro Na Ha’åne Mina’sinko Na Ha’åne Mina’sais Na Ha’åne Mina’siete Na Ha’åne Mina’ocho Na Ha’åne Mina’nuebe Na Ha’åne |
Finenana Na Ha’åne
Mafañagon i Patgon as Jesus.
Kalan un líli’e’ ha’ i Patgon as Jesús guihi gi liyan Bilén, mana’ono’ pañåles, mana’åsson gi pisebre gi hilo’ i ngasan, gi éntalo’ i dos gå’ga’ nu i humahåhayi yan muna’mámaipe gui’. I na pineble, diníkike’ yan tinai nina’siñan i todu ha’ ha hulat na Låhen Yu’os!
Si Sånta Maria yan i asaguå-ña as San Jose dumídimu yan ma ádódora i Sainan i langet yan i tano’. I mananghet siha manágulúlumi yan manlålailai i matunå-ña. Ayu na puengi annai mafañågu i Lahen Yu’os nu i Mama’taotao, muma’lakña ki i nauau yan bula somnak na talo’åni. Ya ná’manman na puti’on sumulo’ gi i sankattan ha tanchúchu’i i taotao siha ni’ i manggágaige gi tano’ amånu nai gaige i Patgon as Jesús.
Manhongge yu’ nu i Patgon nu i hu líli’e’, Guiya muna’huyong yu’ ginen i taya, ya Guiya i todu ha’ ha na’siña na Saina-ta, i taitutuhon yan i taíchi’i, i taíhinekkok na Yu’os-hu nu i Yuma-ña Mama’taotao. Fina’tinas Yu’os Espiritu Sånto, finañågu nu i Bithen as Maria; Guiya muna’kahåya yu’.
I lini’é’-hu guennao, Påtgon ha’ na hinéheggue as Nanå-ña yan iní’iga as San Jose, i mafa’tatå-ña. Yan ma’adódora nu i mamopble yan manmanhongge na pastót giya Bilén. Lao ennao na Påtgon u lámoddong, u na’umitde sagå-ña giya Nasarét, ya u facho’cho’ gi che’cho’ katpenteru. I masahalom i matå-ña nai u nina’chocho Gui’ nu i aggon-ña; ya u taiguennao ha’åni-ña trenta åños.
Ya annai måkpo’ ennao, u gef maså’pet; u uma i makkat na kilu’os i isao-ta siha; ya u lachai numå’enñaihon i ha’åni-ña sa’ u mapuno’ gi hayon i kilu’os. I taotao siha, nu i manmanhongge nu Guiya, yanggen ma dalalaki i fina’nå’gue-ña yan i tinago’-ña siha, u fanhålom gi rainon i langet. Lao i manåguaguat ni i ti manmanhongge ya ha saguaguati, u taíhinekkok manmayogguan-ñiha giya Sasalåguan.
Original Text:
Kalan unlilie-ha i Patgon as Jesus guihe gi liyan Belen, manaono pañales, manaason gi pesebre gi hilo i ngasan, gi entalo i dos gagà ni i humahahaye yan hanamamaipe gue. I na pineble, dinikiki yan tinai-ninasinan i Todo-ha hahulat na Lahen Yuus!
Si Santa Maria yan i asaguaña as San Jose dumidimo yan haadodora i Saenan i lañget yan i tanò. I añghet siha maagululume yan halalailai i matunaña. Ayo na pueñge anae mafañago i Lahen Yuus na Mamataotao, mumalagna ke i nauau yan bula somnag na taloane. Ya nämanman na pution sumulo gi sankatan hatanchuchue i taotao siha ni i mangangagige gi tanò mano nai gaige i Patgon as Jesus.
Manhońgge yo nu i Patgon ni i hulilie: guiya yo munahuyong gine i taya; ya guiya i Todo-ha hanasina na Saenata, i taitutuhon yan i taichii, taihinekog na Yuosso ni i yumaña mamataotao finâtinas Yuus Espiritu Santo, finanago nu i Bithen as Maria; guiya Minakahaya yo. I linieeho guenao patgon-ha na hinehegue as Nanaña yan iniiga as San Jose i mafa’tataña, yan inadodora nu i mamoblie yan man manhoñgge na pastot giya Belen. Lao enao na Patgon ulámodong, unaumitde sagaña giya Nasaret, ufachocho gi chechô katpintero, i masahalom i mataña nai uninachocho gue ni agonna; ya utaeguenao haanina trenta años. Ya añg manmagpo yenao, ugefmasâpet, uuma i makat na kiluus i isaota siha; ya ulachai numaenaihon i haanina sa umapuno gi hayon i kiluus. I taotao siha ni i manmanhongge nu guiya, yagin uhadalalag i finanaguena yan i tinagoña siha, ufanhalom gi rainon i lañget. Lao i man águaguat ni i ti manmanhoñgge ya hasaguaguate, utaihinekog manmayoguanniha giya sasalaguan.
I Mina’dos Na Ha’åne
(Todo taeguihe-ha i Finenana na Haane; tulaika-ha yine:)
I sen Såntos na NÅ’AN “JESUS”
Kalan un líli’e i linahyan i manånghet yan i manganite yan i taotao siha na mandídimu yan ha tekúkune i sénsantos na NÅ’AN JESUS, nå’an ni i minaolekña umí’ige i pumalon nå’an siha, sa’ inayek gi lañget as Yu’us Tåta annai tåtaya’ taotao yan tånò, ya manågò na u mafana’an JESUS, i maisa na Lahi-ña ni i Yu’us Taotao. Annai munhåyan maloffan ocho na ha’åne na mafañågu i yini’usan na Påtgon giya Belen, machåchakñaihon i lassas i sensen-ña ya mafana’an as JESUS.
I na’an JESUS, guiya ha’ inangoko-ku. Åpmam na mahuchom i fanhalumam i lañget sa’ manisao i taotao siha. Lao i Lahen Yu’us, i mina’dos na Petsonan i Sinantusan Trinidåd mumagof tumunok mågi. Ha chuda’ i sen såntos na hagå’ña ya ha na’fangahaya hit gi isao-ta yan i kinautiban i aniti as Satanas. I ha’ånen Åñu Nuebu annai ha tutuhon mañuda håga’ ginen i mahatot na machachåk-ña i náma’agoddai na Låhen Sånta Maria. Tinago Yu’us na i Finañagon i Bithen umáyaho as JESUS, na kumekilek-ña “Nanalibre”; nå’an ni i u madimuyi nu i mangi-langet i mangi-tano’ yan i mangi-sasalåguan. Enao na yini’usan Nå’an u láchachai muna’fańgahaya i taotao siha, yanggen siha mangéf-malago’. I Sénsantos na Nå’an JESUS siña u na’hago yu’ meggai na gråsia yan mina’åse långet, yan lokkue’ i sásahnge na gineguen Yu’us ni i u choma yu’ nu hu basnak gi tentasion; ya enao ha’ u na’manå’i yu’ ti mantufungon na minaolek tåno’, kulolo’ña ayu siha i u ha fa’maulek i anti-hu. Sa’ guaha sinangan Jesukristo ya u huhońg magåhet: na mi nina’siña i Sénsantos na Na’ån-ña yanggen ta sanganñáñaihon ya ta gagao si Yu’us Tåta nu ayu siha i ha tåtanga i korason-ta.
Original Text
(Todo taeguihe-ha i Finenana na Haane; tulaika-ha yine:)
I sen Santos na NAAN “JESUS”
Kalan unlilie i linahyan i man anghet yan i manganite yan i taotao siha na mandidimo yan hatekukune i sensantos na NAAN JESUS, naan ni i minaulegña umiige i pumalon naan siha, sa inayeg gi lañget as Yuus Tata anae tataya taotao yan tanò, ya managò na umafänaan JESUS, i maisa na Lahiña ni i Yuus.Taotao. Anae munhayan malofan ocho na haane na mafañago i yiniusan na Patgon giya Belen, machachagñaihon i lasas i sensenña ya mafânaan as JESUS.
I naan JESUS, guiya-ha inangokoko. Abmam na mahuchom i fanhalumam i lañget sa manisao i taotao siha. Lao i Lahen Yuus, i mina dos na Petsonan i Sinantusan Trinidad mumagof tumunog magi. Hachuda i sen santos na hagàna ya hanafangahaya hit gi isaota yan i ki nautiban i anite as Satanas. I haanen Año Nuebo anae hatutuhon mañuda hagà ginen i mahatot na machachagña i námaagodai na Lahen Santa Maria. Tinagò Yuus na i Finañagon i Bithen umayaho as JESUS, na kumeilegña “Nanalibre”; naan ni i umadimuye nu i mangi-langet i mangi-tano yan i mangisasalaguan. Enao na yiniusan Naan ulachachai munafańgahaya i taotao siha, yagin siha mangef-malago. I Sensantos na Naan JESUS sina unahago yo megai na grasia yan minaase langet ,yan lokue i sasahnge na gineguen Yuus ni i uchoma yo nu hubasnag gi tentasion; ya enaoha unamanae yo ti mantufungon na minauleg tanò, kololona ayo siha i uhafamauleg i antiho. Sa guaha sinangan Jesucristo ya uhuhońg magahet: na mininasina i Sensantos na Naaña yagin tasangannañaihon ya tagagao si Yuus Tata nu ayo siha i hatatańga i korasonta.
Mina’tres Na Ha’åne
Manmåtto i Pastot siha.
Kalan un líli’e ha’ i pastot siha giya Belen. Man nina’tungo’ nu i anghet Yu’us gi halomtåno’, ya ha fatótoigue i liyan ni sagan gå’ga’. Sumén ma’lak ayu na tatalo’ puengi. Man é’ekahat manhålom guatu, mandimu gi fi’on annai manå’asson i Patgon as Jesus. Ti sangånon i takhalom inatan-ñiha nu i yini’usan na Finañågon Sånta Maria ni i man iná’atan kulan chumålek háhalom. I pachot-ñiha yan i korason-ñiha nai ha sangånñáñaihon na ayu na Påtgon guiya i Matátañga na Mesias pat i Kristo, ni u na’fangahåya i famagu’on Israet. I pastot siha manmanhongge yan manmanggofli’e as Yu’us; ya siha fumanåna’gue yu’ na maulekña na hu gofli’e si Yu’us nu todo i korason-hu.
I Saina-ta as Yu’us ha gofli’e yu’ nåya. Ya guahu hu na’keke’maolek oppe-ku nu guiya. Iya guahu ha’ ha háhasso si Yu’us sa’ yo’åse gue’ na Tatå-hu. I ginefli’e-ña nu guahu mina’ ha na’ginen i taya’ yu’, ya ha tåtanga na hu saonao gi langet gi taihinekkok na ginefsagå-ña. Ti nahong gue’ nu enao. Sinisi’on nu i mampos na guinaiya-ña nu guahu, ha na’tunok påpa’ i maisa na Låhi-ña, ya ha po’lo na u mapuno’ gi kilu’us ya ha apasiyi yu’ nu i isao-hu siha.
Si Yu’us Låhi-ña lokkue’ sumén háhanon ginefli’e-ña nu guahu annai ha dingu i langet ya mama’taotao ya ha toktok i pinepble yan i chinatsaga siha yan i finatai gi kilu’us, sa’ ha tåtanga na u nina’ñaha i mahetok na korason-hu. Ha hulat yu’; ya håfa ha malagúgu’i apås-hu nu guiya? Na hu gofli’e ha’ gue’. Na hu gofli’e si Yu’us Tåta nu i nina’siñan yan i hinilat i korason-hu na ginefli’e, meggaiña ki iya guahu ha’ yan i ha’åni-hu. Ada taiguennao nåya i ginefli’e-hu nu guiya?
Original Text:
Manmato i Pastot siha.
Kalan unlilie-ha i pastot siha giya Belen. Man ninatungo nu i añghet Yuus gi halomtanò, ya hafatotoigue i liyan ni sagan gagà. Sumen malag ayo na tatalopuenge. Man eekahat manhalom guato, mandimo gi fion anae manaason i Patgon as Jesus. Ti sañganon i tagkalom inatanniha nu i yiniusan na Finañagon Santa Maria ni i man inaatan kulan chumaleg-hahalom. I pachotniha yan i korasonniha nai hasangannañaihon na ayo na Patgon guiya i Matatañga na Mesias pat i Kristo, ni unafangahaya i famaguon Israel. I pastot siha manmanhongge yan manmangoflie as Yuus; ya siha fumananague yo na maulegna na hugoflie si Yuus nu todo i korasonho.
I Saenata as Yuus hagoflie yo naya. Ya guaho hunakekemauleg opeko nu guiya. Iya guaho-ha hahahaso si Yuus sa yoasè gue na Tataho. I gineflieña nu guaho mina hanaginen i taya yo, ya hatatanga na husaonao gi langet gi taihinekog na ginefsagña. Ti nahon gue nu enao. Sinision nu i manpos na guinaeyaña nu guaho, hanatunog papa i maisa na Lahina, ya hapôlo na umapuno gi kiluus ya haapasiye yo nu i isaoho siha.
Si Yuus Lahina lokue sumen hahanon ginefliena nu guaho anae hadingo i langet ya mamataotao ya hatogtog i pineble yan i chinatsaga siha yan i finatai gi kiluus, sa hatatanga na uninañaha i mahetog na korasonho. Hahulat yo; ya hafa hamalagugue apasso nu guiya? Na hugoflie-ha gue. Na hugoflie si Yuus Tata nu i ninasinan yan i hinilat i korasonho na giniflie, megaina ke iya guaho-ha yan i haaniho. Ada taeguenao naya i gineflieho nu guiya?
Mina’kuatro Na Ha’åne
Inato i Tres Reyes
Kalan un líli’e guini i sén ma’lak na puti’on ni i mali’e gi lassas i langet gi sumankattan, ya i tres Reyes ni i dumadálalak i mina’lak-ña manma’udai gi ga’-ñiha kameyu, ya manmalak Hudédea, annai mandimu gi me’nan i Pa’go Mafañågu na Rai i manhudios, ya ma atútu’i gue’ oru, insienso, yan mirra. I puti’on sumåga gi hilo’ i liyan annai gágaige i Patgon as Jesus.
Liyan gå’ga ha’ i fanlihengan i Rai i langet yan i tano’. I tagåhlo’ yan todu ha’ ha na’siña na Yu’us Taotao ha na’sásahnge gumofli’e i pinepble, ya yumå’ña umayek i chatsaga’ yan i nápiniti. I tres Reyes mankinenne’ guatu nu i lalala’ na hinenggen-ñiha. Manggefilo’ yan manggefmanhonngge, manhalom gi fina’palåsyon i Lahen Yu’us, ha dimuyi i Patgon ni i fuma’tinas i langet yan i tano’ yan i mansinahguan giya siha, si Jesus ni i sumísiha yan i Nanå-ña yan si San Jose. Ha panakñaihon siha guatu ya ha nå’i oru i Dikiki’ na Rai, insienso i Ma’gas na Yu’us, yan mirra ni i u pinalaiñaihon si Yu’us Taotao sa’ ti apmam u chu’ot mahåtot na finatai yan u mahåfot gi naſtan.
Guahu lokkue’ hu dalalaki i maolek na fina’tinas-ñiha; ya hu atu’i si Jesus ni korason-hu yan i ginefli’e-hu, fina’oru ni i gaige giya guahu. Hu chudå’i gue ni tinayuyot-hu, fina’paopao na insienso ni i mámagap giya halólom i anti-hu. Ya hu na’gígihen umatu’i gue ni manmaolek na che’cho-hu siha, guaiyayon-ña ki i mirra; sa’ i che’cho i mangilisyåno ha í’ige i minaolek i tinekcha’ yan i minagap i trongkon hayu siha.
Lao i Saina-ta as Jesukristo guaha sásahnge minalago’-ña giya hita. I minalago’-ña na u ta geflamen yan u ta gofli’e magahéhet i tiguang-ta ya u ta cho’guiyi ya u ta na’fanggefmagof i manggaipiniti sa’ guiya ha’ as Yu’us machoguiguiyi an ha magéflamen i pepble ni taya’ guinahå-ña yan i manaimañaina yan i manmalåñgu. Annai gágaige ha’ gi tano’ i Saina-ta as Jesukristo ha sångan: “In fa’tinasi i mandikiki na mañe’lu-hu, ya guahu ha’ na maisa in fa’tinåsi. Enao mina’ boi hu ma’asi’i yan hu ke’fa’maolek i mamopble taimanu i kadada’ pat anåkko’ na nina’siñan i kannai-hu yan i guinaha-hu siha.
Original Text:
Inato i Tres Reyes.
Kalan unlilie guine i sen malag na pution ni i malie gi lasas i lañget gi sumankatan, ya i tres Reyes ni i dumadalalag i minalagna manmaudai gi ganiha kameyo, ya manmalag-Judedea, anae mandimo gi mênan i Pago Mafañago na Rai i. manhudios, ya maatutue gue oro insienso yan mirra. I pution sumaga gi hilo i liyan anae gagaige i Patgon as Jesus.
Liyan gaga-ha i fanlihengan i Rai i langet yan i tanò. I tagahlo yan todo-ha hanasina na Yuus-Taotao hanasasahnge gumoflie i pineble, yayumaña umayeg i chatsaga yan i nápinite. I tres Reyes mankinene guato nu i lalalà na hinenggenniha. Mangêfilo yan mangefmanhonngge, manhalom gi fina-palasyon i Lahen Yuus, hadimuye i Patgon ni i fumâtinas i langet yan i tanò yan i mansinahguan giya sina, si Jesus ni i sumisiha yan i Nanaña yan si San Jose. Hapanagnaihon siha guato ya hanae oro i Dikiki na Rai, insienso i Mâgas na Yuus, yan mirra ni i upinalainaihon si Yuus Taotao sa ti admam uchuot mahatot na finatai yan umahafot gi naſtan.
Guaho lokue hudalalake i mauleg na finâtinasniha; ya huatue si Jesus ni korasonho yan i gineflieho, fina-oro nii gaige giya guaho. Huchudae gue ni tinayuyotto, fina-paopao na insienso nii mamagap giya halolom i antiho. Ya hunagigihen umatue gue ni manmauleg na chechôho siha, guaeyayonña ke i mirra; sa i chechò i mańgilisyano haiige i minauleg i tinegchà yan i minagap i tronkonhayo siha.
Lao i Saenata as Jesukristo guaha sasahnge minalagona giya hita. I minalagoña na utageflamen yan utagoflie magahehet i tiguańgta ya utachoguiye ya utanafangemagof i mangaipinite sa guiya-ha as Yuus machoguiguiye an-ha mageflamen i peble ni taya guinahaña yan i manai-mañaena yan i manmalañgo. Anae gagaige-ha gi tanò i Saenata as Jesukristo hasangan: “Infatinase i mandikiki na maneluho, ya guaho-ha na maisa infâtinase. Enao mina, boi-humaasie yan hukefamauleg i mamoble taemano i kadada pat anako na ninasinan i kanaiho yan i guinahaho siha.
Mina’sinko Na Ha’åne
Mafattan Jesus gi gima’ Yu’us Herusalem.
Kalan un líli’e si San Jose yan si Santa Maria na kokokolo guatu gi gima’ Yu’us Herusalem gi mina’kuarenta na ha’åne ginen i mafañågon i Patgon as Jesus. Mansugo guatu. Ya si Sånta Maria yan si San Jose ha na’hineggue as Simeon i Dikiki’ na Påtgon; ya i Profeta ha ofresi si Yu’us Tåta nu i mámaisa ha’ na Låhi-ña, sa’ ha géftungo’ na i hinaguegue-ña na Påtgon ti iyon i taotao na iyon Yu’us ha’ na gaige gi lañget. I Patgon as Jesus, achokka’ mamamatkilu ha’ ha nå’iñaihon lokkue’ i ha’åni-ña as Tatå-ña, tulaika yan fina’åpas i ma’isågue-ña, sa ha tåtangan na i famagu’on Adan yan Eba u fanmalak i langet. Si Yu’us Tåta gi sen ma’lak na Fanmata’chungan gi lañget nina’magof ya ha chåhlao magof i nina’en Jesukristo ni Lahi-ña yan i Nanan i Patgon as Sånta Maria. Ha cháchahlao nai, achokka ha po’loñaihon ta’lo gi trentai tres na såkkan gi kannai i Nanå-ña.
Finakpo-ña, i Patgon as Jesus ma’apåsiyi dos paluma taiguihi i tinago’ Moises nu i taotao siha ni i mamopble yan tåya’ meggai iyon-ñiha.
Guahu lokkue’ ma’tågo’ yu’ na hu nå’i si Yu’us ni guinahå-hu siha sa’ iyo-ña siha. Maggode yu’ lokkue’ na hu fa’saina-hu si Yuus, sa’ i kannai-ña muna’huyong yu’ gine i taya’; ya enao hu fa’tinas sesso, kulolo’ña an ogga’an gin kahúhulo yu’ gi asson-hu yan ta’lo an puengi gin kumeke’maigo; ya hu ta’lo gin Damenggo yan må’gas gupot annai hu gopte gefkilisyåno i Saina-ta, hu osge i Santa Iglesia, ya hu hånao magof humosme misa yan hu cho’gue i che’cho’-ta na mangilisyano, ayu siha i manyo’åse na che’cho ni i u ha na’hasso yu’ na iyon i Sainan i tátaotao-hu yan i anti-hu yan i guinaha siha ni i hu fa’nána’an na iyo-ku. Nånalau! Ya håfa taimanu inesge-ku nåya nu enao i matago-hu?
Mafatan Jesus gi gumayuus Jerusalem.
Kalan unlilie si San Jose yan si Santa Maria na kokokolo guato gi gumayuus Jerusalem gi mina kuarenta na haane ginen i mafañagon i Patgon as Jesus. Mansugo guato. Ya si Santa Maria yan si San Jose hanahinegue as Simeon i Dikiki na Patgon; ya i Profeta haofrese si Yuus Tata nu i mamaisa-ha na Lahiña, sa hageftungo na i hinaguegueña na Petgon ti iyon i taotao na iyon Yuus-ha na gaige gi lañget. I Patgon as Jesus, achog-ha mamamatkilo-ha hanaenaihon lokue i haanina as Tataña, tulaika yan fina-pas i maisagueña, sa hatatangan na i famaguon Adan yan Eba ufanmalag i lañget. Si Yuus Tata gi sen malag na Fanmatachungan gi lañget ninamagof ya hachahlao magof i ninaen Jesukristo ni Lahina yan i Nanan i Patgon as Santa Maria. Hachachahlao nai, achog-ha ha pöloñaihon talo gi trenta i tres na sakan gi kanai i Nanaña.
Finagpoña, i Patgon as Jesus maapasiye dos paluma taeguihe i tinagò Moises nu i taotao siha ni i mamoble yan taya megai iyonniha.
Guaho lokue matagò yo na hunae si Yuus ni guinahaho siha sa iyoña siha. Magode yo lokue na hufasaenaho si Yuus, sa i kanaiña munahuyong yo gine i taya; ya enao hufâtinas seso, kololona an ogaan gin kahuhulo yo gi asonho yan talo an puenge gin kumekemaigo; ya hutalo gin damenggo yan magas gupot anae hugopte gefkilisyano i Saenata, huosge i Santa Iglesia, ya huhanao magof humosme misa yan huchogue i chechota na mangilisyano, ayo siha i manyoase na chechò ni i uhanahaso yo na iyon i Saenan i tataotaoho yan i antiho yan i guinaha siha ni i hufânanaan na iyoko. Nana lao! Ya hafa taemano inesgeko naya nu enao i matagòho?
Mina’sais Na Ha’åne
Finalagu guatu giya Ehipto.
Kalan un líli’e i rai as Herodes na manånago na u mapuno’ i Patgon as Jesus, sa hináhalang i korason-ña na u inamotguan nu i raino-ña. Manmapuno’ ayu na ha’åne i famagu’on ni i dos åños påpa såkkan-ñiha giya Belen yan i man áchetton na songsong siha. I anghet Yu’us ha na’tungo’ si San Jose na guaha kumeke’puno’ si Jesus. Ya i santos na Patriatka ayu ha’ na puengi ha konne’ i Patgon yan i Nanå-ña yan manmalågu guatu giya Ehipto na tåno’. Siette åños i mañågan-ñiha guihi. Lao annai måtai i båba yan taglahiyon na rai, i anghet ha tågo’ si San Jose na u fana’lu guatu Israel. Ya manmå’pos siha ya mañåga giya Nazaret.
Taiguennao fina’tinánas-ña i Saina-ta as Yu’us nu i anti siha ni i man inayek-ña. Yanggen muto’ si Yu’us, siña ha puno’ si Herodes pat ha chomma na u na’låmen i yini’usan na Påtgon. Lao ga’o-ña na i tailayi na rai u lulok nåya i båba na hinasso-ña; sa’ ha keke’fa’nå’gue hit na u ta tungo na i mañåntos gi tano’ guaha nai u fanmasåpet yan u fanmana’tailayi. Ya enao i magåhet na chålan långhet, lu maiot, mitituka yan nápiniti.
Guahu lokkue hu eyak na yanggen hu keke’hago i rainon i langet, yanggen hu keke’abok yan si Yu’us, hu hasso na u fansilok i chinatsaga yan i piniti gi fi’on i korason-hu. Yanggen mana’tailayi pat mana’piniti yu’, håfa hu cho’gue? Hu dalalaki i minesngon yan i chumilong hinalom yan i ti aguyon na minatatngan Sånta Maria yan i asagua-ña as San Jose; hu famatkilo ha’ ya hu setbe si Yu’us månu ha pinelólo-ña nu guahu.
Ada taiguennao i minesngon-hu nåya annai masåsapet yan mapetsísigi yu’ nu i taotao siha?
Original text:
Finalago guato giya Egipto.
Kalan unlilie i rai as Erodes na mananagò na umapuno i Patgon as Jesus, sa hinahalang i korasonna na uinamotguan nu i rainoña. Manmapuno ayo na haane i famaguon ni i dos años papa sakanniha giya Belen yan i man ácheton na songsong siha. I añghet Yuus hanatungo si San Jose na guaha kumekepuno si Jesus. Ya i santos na Patriatka ayoha na puenge hakone i Patgon yan i Nanaña yan manmalago guanto giya Egipto na tanò. Siete años i mañaganñiha guihe. Lao anae matai i baba yan taglahiyon na rai, i añghet hatagò si San Jose na ufanalo guato Israel. Ya manmapos siha ya mañaga giya Nazaret.
Taeguenao finâtinanasna i Saenata as Yuus nu i ante siha ni i man inayegña. Yagin muto si Yuus, sina hapuno si Erodes pat hachoma na unalamen i yiniusan na Patgon. Lao gaoña na i tailaye na rai ululog naya i baba na hinasoña; sa hakekefanague hit na utatungo na i manantos gi tanò guaha nai ufanmasâpet yan ufanmanatailaye. Ya enao i magahet na chalan lañget, lu maiot, mitituka yan nápinite.
Guaho lokue hueyag na yagin huke kehago i rainon i langet, yagin hukeke abog yan si Yuus, huhaso na ufansilog i chinatsaga yan i pinite gi fion i korasonho. Yagin manatailaye pat manapinite yo, hafa huchogue? Hudalalakei minesngon yan i chumilong hinalom yan i ti aguyon na minatatngan Santa Maria yan i asaguaña as San Jose; hufamatkilo-ha ya husetbe si Yuus mano-ha pineloloña nu guaho.
Ada taeguenao i minesngonho naya anae masasâpet yan mapetsisige yo nu i taotao siha?
Mina’siete Na Ha’åne
Gima Nazaret.
Kalan un líli’e ha’ i Sagråda Familia gi halom i etego na guma’ Nazaret annai mañísiha si Jesus yan si Jose yan si Maria. Si Jesukristo humålom gi mina’ocho años i sakkån-ña. Achagåtbo yan i langhet, yo’åse umadingan-ña, mames mamatanña gi halom taotao, yini’usan na minames. Lumalámoddong gi gråsia yan i tiningo. Ogga’an yan puengi manánaitai kalan Yu’us Taotao, dumídimu gi me’nan i Tatå-ña, ya i Tatå-ña tinítina lokkue’ annai kumeke’chocho yan an måkpo chumocho. Guaha tenga nai ha tátane gue i che’cho sumísiha yan si San Jose. Guaha nai tenga ha choguiguiyi i nanå-ña ya ha fa’mámaolek i gima’; tenga nai humúhuyong ya mañisiha yan i famagu’on taotao manatatnon gi chalan, ya i manggachong-ña mannina’manman nu i minaolek yan i minames ni i mámagap gi pachot-ña yan i kinalamten-ña. Siette åños inapmam-ña i Sagrådo na Familia giya Egipto na tan, ya ti sanganon i minagof Sånta Maria yan i asagua-ña as San Jose annai mansinedda’ gi lágefsaga na guma’-ñiha giya Nazaret. Lao matto lokkue gi hinason-ñiha na i ha guaiya na Patgon Yu’us ti apmam u masåpet yan u mapuno’ gi kilu’us.
I mámagap guennao na i Saina-ta as Yu’us ha na’mámagof gue nu i taotao siha yanggen á’anok i tinai-nina’siña-ñiha. Hana- fanátahgue i piniti yan i minagof siha gi halom guma’. Gaitiningo yu’ nu enao; ya mungą’ ho muna’takhilo yu’ yanggen hu fakcha’i i ginefsaga ni i haflak yan fáfapos ya hu tungo i fina’fapos-ña. Munga’ ho lokkue tumaihinalom yanggen ha hinegse yu’ nu i chinatsaga taiguihi mohon i sinala yan yiniti yu’ as Yu’us. Lao hu tuna i Saina-ta gi ginefsaga yan i chinatsaga sa’ acha’pine’lon Yu’us, acha’nina’ina nu guahu, ya siha u ha na’hago yu’ ni langet ya enao ha’ ginagagao-ña giya guahu tulaikan i manoftof na fina’maolek-ña nu i anti-hu. Ti hu na’maloffan i ha’åne na ti hu tuna yan hu na’tagkilo i santos na Na’ån-ña.
Lao haftaimanu fina’tinas-hu nåya gi chinatsaga yan i ginefsaga siha?
Gima Nazaret.
Kalan unlilie-ha i Sagrada Familia gi halom i etego na gumà Nazaret anae manisiha si Jesus yan si Jose yan si Maria. Si Jesukristo humalom gi mina ocho años i sakanña. Acha-gatbo yan i lañget, yoase umadinganña, mames mamatanña gi halom taotao, yiniusan na minames. Lumalamodong gi grasia yan i tiningo. Ogaan yan puenge mananaitai kalan Yuus-Taotao, dumidimo gi mênan i Tataña, ya i Tatana tinitina lokue anae kumekechocho yan an magpo chumocho. Guaha teñga nai hatatane gue i chechò sumisiha yan si San Jose. Guaha nai teñga hachoguiguiye i nanaña ya hafamamauleg i gimà; tenga nai humuhuyong ya mañisiha yan i famaguon taotao manatatnon gi chalan, ya i mangachongña manninamanman nu i minauleg yan i minames ni i mamagap gi pachotña yan i kinalamtenña. Siete años inabmamña i Sagrado na Familia giya Egipto na tan, ya ti sanganon i minagof Santa Maria yan i asaguaña as San Jose anae mansineda gi la-gefsaga na gumàñiha giya Nazaret. Lao mato lokue gi hinasonniha na i haguaeya na Patgon Yuus ti abmam umasäpet yan umapuno gi kiluus.
I mamagap guenao na i Saenata as Yuus hanamamagof gue nu i taotao siha yagin aanog i tinai-ninasinaniha. Hana-. fan átahgue i pinite yan i minagof siha gi halom gumà. Gaitinińgo yo nu enao; ya mungą ho. munatagkilo yo yagin hufagchae i ginefsaga ni i haflag yan fafapos ya hutungo i finafaposña. Muñga ho lokue tumaihinalom yagin-ha hinegse yo nu i chinatsaga taeguihe mohon i sinalà yan yinite yo as Yuus. Lao hutuna i Saenata gi ginefsaga yan i chinatsaga sa acha-pinelon Yuus, achaninaina nu guaho, ya siha uhanahago yo ni langet ya enao-ha ginagagaoña giya guaho tulaikan i manoftof na finamaulegna nu i antiho. Ti hunamalofan i haane na ti hutuna yan hunatagkilo i santos na. Naanña.
Lao haftaemano finatinasso naya gi hinatsaga yan i ginefsaga siha?
Mina’ocho Na Ha’åne
Mina’ocho Na Ha’åne
Si Jesukristo gi gima’ Yu’us Herusalem.
Kalan un líli’e guini ha’ gi me’nå-mu i náma’agoddai na Påtgon as Jesus na sumísiha yan i Nanå-ña yan si San Jose. Man inesgágaihon nu meggai na mañataotao-ñiha manhåhanao guatu giya Herusalem. Mangigo’ i tres mansugo guihi måkpo i tinayuyut yan i che’cho’-ñiha gi sanhalom i ma’gas na guma’ Yu’us, manmahnao yan manhånao talo gi tano’-ñiha. Si Santa Maria umetnon yan i famalao’an; ya San Jose ha dalalak i lalåhi. På’go, i famagu’on siña ha’ ha osgaihon i tata pat i nana. Annai tuma’lo umásodda’ si Maria yan si Jose, ha li’e na taigue si Jesus giya siha. Kulan inachan makkat na mattiyu ayu na piniten i Korason-ñiha. Mamámaisen nu i palu siha na mangga’chong kao guaha nai lini’e si Jesus; lao tåya’ lumi’e i yini’usan na Påtgon.
Hu háhasso yan hu na’mangto guini i mahåtot sumén mala’et na piniten Maria yan Jose. Man osgon nu i pintó Yu’us; lao kalan machaflilek i korason-ñiha, sa’ ti sangånon i minakkat i piniten-ñiha guihi. Tuma’lo guatu Herusalem, ha layague i ti man tufungon yan manáfutut na chålan i siudåd Yu’us.
Håfa na ha na’diningu gue nu i Nanå-ña yan si San Jose? — I malago’-ña na u fa’nå’gue yu’ na guaha lokkue’ pinto-ña na hu tane yu’ gi che’cho’ i Tatå-ña na gaige gi langhet. Yanggen malago’ i Saina-ta as Yu’us na hu na’fo’na chumo’gue i tinago’-ña nu guahu ki i tinago taotao siha, ayu ha’ hu na’fo’na. Yanggen i korason-hu kineke’hulat nu i piniti yan i tinanges i mañaina-hu pat i manáchihet-hu, u hasso i fina’pos i Niño Jesus yan i mañaina-ña ni i mina’i’eyak yu’ na mo’na si Yu’us ki i taotao. Si Maria yan si Jose finalingaiguan nu i Patgon as Jesus, lao ti hinasngune, ti isao-ñiha yenao. Si Yu’us ha’ gumai pinto, guiya chumáchagi i minesngon-ñiha, sa’ dångkulo i ginefli’e-ña nu siha. Annai chumåchalan siha tres na ha’åne gi sanhalom iya Herusalem, manmå’pos ha’ ha dalalaki guatu i ma’gas guma’ Yu’us, annai ha sodda’ i Patgon Yu’us ni i matåta’chong guihi man á’asangåni yan i manhulon yan i manmå’gas na måmale’, man áfaisen yan man á’oppe nu i manlinangitan siha.
Ya guahu, ada ti hu na’falingu si Yu’us, ya tenga hu hasngne? Hu’o nai. Hu na’inale yu’ ya hu isågue si Yu’us makakat. Hu na’abak si Jesus; ha falingaiguan yu’ si Yu’us. Hokkok malingu-hu! I na binaba; i na tinailaye-ku! Ya på’go na ha’åne ada ti hu atotga’ tuma’lo umaligao ya hu na’fañotsot i korason-hu yan hu na’metton i hinasso-ku ya ti u letke ta’lo si Yu’us? Ada ti hu gagao i yini’usan na Korason na u gaipiniti nu guahu?
Hunggan. Boi hu gefkonfesåt i isao-hu siha, ya hu setbe si Yu’us ni Saina-hu yan Tatå-hu; ya ti hu abak ta’lo giya guiya gi tétehnan i ha’åne-hu.
Original Text:
Si Jesukristo gi gumayuus Jerusalem.
Kalan unlilie guine-ha gi mênamo i námaagodai na Patgon as Jesus na sumisiha yan i Nanaña yan si San Jose. Man inesgagaihon nu megai na mañataotaoniha manhahanao guato giya Jerusalem. Mangigo i tres mansugo guihe. magpo i tinayuyut yan i chechoñiha gisanhalom i magas na gumayuus, manmahnao yan manhanao talo gi tanoñiha. Si Santa Maria umetnon yan i famalaoan; ya San Jose hadalalag i lalahe. Pago, i famaguon sina-ha haosgaihon i tata pat i nana. Anae tumalo umásoda si Maria yan si Jose, halie na taigue si Jesus giya siha. Kulan inachan makat na mattiyo ayo na piniten i Korasonniha. Mamamaisen nu i palo siha na mangachong kao guaha nai linie si Jesus; lao taya lumie i yiniusan na Patgon.
Huhahaso yan hunamangto guine i mahatot sumen malaet na piniten Maria yan Jose. Man osgon nu i pintó Yuus; lao kalan machaflileg i korasonniha, sa ti sanganon i minakat i pinitenniha guihe. Tumalo guato Jerusalem, halayague i ti man tufungon yan man áfutut na chalan i siudad Yuus.
Hafa na hanadiningo gue nu i Nanana yan si San Jose? — I malagoña na ufanague yo na guaha lokue pintoña na hutane yo gi chechò i Tataña na gaige gi lañget. Yagin malago i Saenata as Yuus na hunafona chumogue i tinagoña nu guaho ke i tinagò taotao siha, ayoha hunafona. Yagin i korasonho kinekehulat nu i pinite yan i tinanges i mañaenaho pat i manáchihetto, uhaso i finapos i Niño Jesus yan i mañaenaña ni i minaecyag yo na mona si Yuus ke i taotao. Si Maria yan si Jose finalingaiguan nu i Patgon as Jesus, lao ti hinasngune, ti isaoniha yenao. Si Yuus-ha gumuai-pintö, guiya chumachage i minesngonniha, sa dañg. kulo i’ gineflieña nu siha. Anae chuma chalan siha tres na haane gi sanhalom iya Jerusalem, manmapos-ha hadalalake guato i mâgas gumayuus, anae hasoda i Patgon Yuus ni i matatachońg guihe man áasangane yan i manhulon yan i manmâgas na mamalè, man áfaisen yan man áope nu i manlinangitan siha.
Ya guaho, ada ti hunafalingo si Yuus, ya tenga huhasngne? — Huo nai. Hunainale yo ya huisague si Yuus makakat. Hunaabag si Jesus; hafalingaiguan yo si Yuus. Hokog malinguho! I na binabà; i na tinailayeko! Ya pago na haane ada ti huatotga’ tumalo umaligao ya hunafanotsot i korasonho yan hunameton i hinasoko ya ti uletke talo si Yuus? Ada ti hugagao i yiniusan na Korason na ugaipinite nu guaho?
Hunggan. Boi-hugeffonfesat i isaoho siha, ya husetbe si Yuus ni Saenaho yan Tataho; ya ti huabag talo giya guiya gi tetehnan i haaniho.
Mina’nuebe Na Ha’åne
Gof manosgen Jesus.
Kalan un líli’e guini ha’ gi me’na-mu i Patgon as Jesus annai ha dingu i gima’ Yu’us Herusalem ya tuma’lo guatu Nazaret mañísiha yan si Santa Maria yan si San Jose. Sumåga giya Nazaret trenta åños, maniné’esge ha’. I Patgon as Jesus annai ha dingu tres na ha’åne i mañaina-ña gi gima’ Yu’us, ha fa’nåna’gue hit nu u ta osge guse i sásahnge na pinto Yu’us giya hita, ya u ta po’loñaihon i guinaiyan i tátaotao-ta yanggin enao ti umá’aya yan i takhilo’ na pinto-ña.
Lao annai tuma’lo guatu Nazaret, tåya’ manmasangånen-måmi, na guiya man ó’osge ha’ as Maria yan Jose. I malago’-ña guini muna’eyak hit na sen tunayon i manosge nu i mañaina yan i manmå’gas ni i manggaípeka, sa’ si Yu’us ha’ ma’osgígiyi giya siha, ya siha ha’ huyúyungi i Saina-ta guini gi tano’. I humóhongge i taotao ni i gumehilúlu’i, si Yu’us Tåta ni i gaige gi langhet ha hóhongge. På’go, i aguaguat, i chatmanosge nu i tátago na må’gas, si Yu’us na todu ha’ ha na’siña chinató’osge yan sinagúaguati. Magåhet na i mañaina yan ayu siha i mangógohe mantinago as Yu’us na cha-ñiha muna’húhuyong tinago siha ni i manácha’ot yan i tinago Yu’us yan i tinago i Santa Iglesia.
Chatmatågo, aguaguat i taotao; ti ya-ña manosge; ti ya-ña magehilu’i. Lao yanggen hu li’e’ i Lahen Yu’us na mama’påtgon ya manó’osge ha’ trenta na såkkan nu i nanå-ña yan si San Jose (lu ti séntatå-ña); haftaimanu yan i manátago?
Original text:
Gof manosgen Jesus.
Kalan unlilie guine-ha gi mnamo i Patgon as Jesus anae badiñgo i gumayuus Jerusalem ya tumalo guato Nazaret manisiha yan si Santa Maria yan si. San Jose. Sumaga giya Nazaret trenta años, manineesge-ha. I Patgon as Jesus anae hadingo tres na haane i mañaenaña gi gumayuus, hafananague hit nu utaosge guse i sasahnge na pintò Yuus giya hita, ya utapolonaihon i guinaeyan i tataotaota yagin enao ti umaaya yan i tagkilo na pintoña.
Lao anae tumalo guato Nazaret, taya manmasanganenmame, nä guiya man oosge-ha as Maria yan Jose. I malagoña guine muna eyag hit na sen tunayon i manosge nu i mañaena yan i manmâgas ni i mangaipekà, sa si Yuus-ha maosgigiye giya siha, ya siha hahuyuyungei Saenata guine gi tanò. I humohongge i taotao ni i gumehilulue, si Yuus Tata ni i gaige gi lañget hahohoñgge. Pago, i aguaguat, i chatmanosge nu i tatagò na mâgas, si Yuus na todo-ha hanasiña chinatoosge yan sinaguaguate. Magahet na i mañaena yan ayo siha i mangogohe mantinagò as Yuus na chañiha munahuhuyong tinagò siha ni i manachaot yan i tinago Yuus yan i tinagò i Santa Iglesia.
Chatmatago, aguaguat i taotao; ti yaña manosge; ti yaña magehilue. Lao yagin hulie i Lahen Yuus na mamapatgon ya manoosge-ha trenta na sakan nu i nanaña yan si San Jose (lu ti sentatana); haftaemano yan i manatago?
Source
Roman Maria De Bera, “Nobenan I Niño Jesus,” Guampedia, accessed November 25, 2024, https://www.guampedia.com/nobenan-i-nino-jesus-novena-to-the-christ-child/
Lengguahi-ta 